Зам, тээврийн хөгжлийн яам, Японы Олон Улсын хамтын ажиллагааны байгууллага ЖАЙКА-тай хамтран “Монгол Улсын зам цаг уурын нөхцөлд тохирсон авто замын хучилтын технологийн чадавхыг сайжруулах” төслийг 2019 оноос хэрэгжүүлж байгаа.

Энэ оны загвар төслийн хоёр дахь хэсэг болох дугуйн мөрний ховилын загвар төслийг Хан-Уул дүүргийн нутаг дэвсгэрт Үйлдвэрийн замд долдугаар сарын 25-ны өдрөөс хэрэгжүүлж эхлээд байна. Энэхүү ажлаар  дугуйн мөрний ховилд тэсвэртэй орц найрлага бүхий хучилт дэвсэж, үр дүнг нь шалгах юм.

Өчигдөр буюу долдугаар сарын 27-нд тус төслийн танилцуулга уулзалт болж Зам, тээврийн хөгжлийн яам, ЖАЙКА-гийн Монгол дахь Төлөөлөгчийн газар, Зам, тээврийн хөгжлийн төв ТӨҮГ, Нийслэлийн замын хөгжлийн газар, Монгол Коосэн Технологийн коллежийн төлөөлөл болон оршин суугчид хүрэлцэн ирж, загвар төслийн агуулгын талаар тайлбар, мэдээлэл хүргэлээ.