ИНЕГ-аас Улаанбаатар-Доной чиглэлд шууд нисэх агаарын замыг нээснээр зөвхөн  “Хүннү Эйр” компани гэхэд л сүүлийн гуравхан сарын хугацаанд нийтдээ 42 удаагийн нислэг үйлдэж, давхардсан тоогоор нийтдээ 4586 зорчигч тээвэрлэжээ. Ингэхдээ нислэгийн 6 цаг 18 минут, 3780 кг түлш хэмнэсэн тооцоо гарчээ. Зам, тээврийн яам болон ИНЕГ-аас гаргасан энэхүү шийдвэр нь эдийн засаг, экологийн төдийгүй, зорчигч үйлчлүүлэгчдийн цагийг хэмнэсэн үр дүнтэй ажил болсон хэмээн үзэж “Хүннү Эйр” компаниас Зам, тээврийн яам болон ИНЕГ-ын удирдлагуудад талархлаа илэрхийлжээ. Энэхүү ажил нь Төрөөс иргэний нисэхийн салбарт 2020 он хүртэл баримтлах бодлогын хүрээнд хийгдэж буй ажлуудын нэг юм.