“Бүс нутгийн ложистикийн төвийг хөгжүүлэх төсөл” Дорноговь аймгийн Замын-Үүд суманд хэрэгжиж байна

“БҮС НУТГИЙН ЛОЖИСТИКИЙН ТӨВИЙГ ХӨГЖҮҮЛЭХ ТӨСӨЛ” ДОРНОГОВЬ АЙМГИЙН ЗАМЫН-ҮҮД СУМАНД ХЭРЭГЖИЖ БАЙНА

Энэхүү төсөл хэрэгжиж Ложистикийн төв баригдсанаар Монгол Улсын импорт, экспорт, дамжин өнгөрөх тээврийн хэмжээ нэмэгдэж эдийн засагт эерэг нөлөө үзүүлэх чухал ач холбогдолтой юм. Монгол Улсын Засгийн Газар энэхүү төслийг санхүүжүүлэх зорилгоор 2011 оны 1 дүгээр сарын 3-ны өдөр АХБ-тай санхүүжилтийн гэрээ байгуулсан ба гэрээнд АХБ-наас 40 сая ам.долларын хөнгөлөлттэй зээл, 5 сая ам.долларын буцалтгүй тусламжийг төслийн хүрээнд олгохоор тусган санхүүжүүлж байна.

Уг  төсөл нь нийт 128 га талбайг хамрах бөгөөд чингэлгийн, хүнд даацын, агуулахын гэсэн 3 бүстэй байхаар төлөвлөгдсөн ба 50 тн даацтай 2 гүүрэн кран, механизмын засварын төв, өргөн болон нарийн царигийн ачилт буулгалтын 11,5 км орчим төмөр зам, ложистикийн төв руу орох гарах төмөр замтай 2 түвшинд огтлолцох хүнд даацын тээврийн хэрэгсэл явах боломжтой гүүрэн байгууламж, 1,6 км авто зам тус тус барихаар төлөвлөгдсөн.

Манай улс энэхүү ложистикийн төвтэй болсноор хүртэх ашгийг өндрөөр тооцоолж байна. Тус ложистикийн төв нь баригдсанаар өргөн хэрэглээний бараа бүтээгдэхүүн, барилга, уул уурхайн салбарын том оврын тоног төхөөрөмж болон манай улсын нутгаар дамжин өнгөрөх транзит ачааг шилжүүлэн ачих техникийн боломж нээгдэж байна. Энэ нь Монгол Улс төдийгүй бүс нутаг дахь тээврийн коридоруудтай манай улсын орц, гарц өрсөлдөх таатай боломжийг бүрдүүлэх юм.

Өнөөдрийг хүртэл Ложистикийн төвийн барилга угсралтын ажил тодорхой үе шаттай хэрэгжиж ирсэн бөгөөд одоогийн байдлаар ложистикийн төвийн үйл ажиллагаанд 11,729,247,546.000 төгрөгийн төсөвт өртөг бүхий 3,6 км цэвэр усны шугамын ажил, Төмөр замтай 2 түвшинд огтлолцох гүүрэн байгууламж, 1,6 км авто замын барилга угсралтын ажил, 4,15 км гадна холбоо интернетийн шилэн кабел суурилуулах ажил, Гадна цахилгаан хангамжийн 110кВ ЦДАШ, дэд станцын өргөтгөл, дэд станцын барилга угсралтын ажил зэрэг ажлуудыг дотоодын гүйцэтгэгч 9 компани хийж гүйцэтгээд байгаа юм.

Ложистикийн төвийн барилга угсралтын ажил 2018-2019 онуудад хэрэгжиж дуусах бөгөөд төслийн хүрээнд Замын-Үүд боомтын хяналт шалгалтын цэг, ачаа дамжин өнгөрүүлэх газрын ачааллыг багасгах, зохицуулах зорилгоор ачааны холимог тээврийн терминалын аж ахуй, ложистикийн үйлчилгээг бий болгох, авто замаас авто зам руу, авто замаас төмөр зам руу болон төмөр замаас авто зам руу ачих, төмөр замын шилжүүлэн ачилтад зориулсан тоног төхөөрөмж, менежментийн системийг нэвтрүүлэх зэрэг терминал ложистикийн байгууламжийг барьж байгуулах юм.

АХБ-ны зээлээс санхүүжигдэж буй үндсэн барилга угсралтын ажлыг гүйцэтгэх гүйцэтгэгчийг шалгаруулах олон улсын нээлттэй тендерийг зохион байгуулж, China Railway 21st Bureau Group компани шалгарч, 2016 оны 2 дугаар сарын 1-ний өдөр Зам, тээврийн хөгжлийн яамтай гэрээ байгуулан барилга угсралтын ажлаа эхлүүлсэн. Барилга угсралтын ажилд хяналт тавих зөвлөх компанийг сонгон шалгаруулах нээлттэй тендерийг зарлаж, сонгон шалгаруулалт явуулсны дүнд “Сүсонг инженеринг” компани шалгарч, 2016 оны 6 дугаар сарын 24-ний өдөр Зам, тээврийн хөгжлийн яамтай гэрээг байгуулж, барилга угсралтын ажилд хяналт тавин ажиллаж байна.

Ложистикийн төвийн 50 тн-ийн 2 вандан краны нийлүүлэлт, угсралт, туршилтын ажлын гүйцэтгэгчээр “Хэнань Дафан Хүнд Машин механизм” компани шалгарч ЗТХЯ-тай 2017 оны 5 дугаар сарын 12-ны өдөр ажил гүйцэтгэх гэрээг байгуулан ажиллаж байна.

Түүнчлэн Ложистикийн төвийн төмөр замын дохиолол, холбооны зураг төсөл, ханган нийлүүлэлт, угсралт суурилуулалт, засвар үйлчилгээний ажлын гүйцэтгэгчээр China Railway 21st Bureau Group компани шалгарч 2018 оны 3 дүгээр сарын 19-ний өдөр ажил гүйцэтгэх гэрээг байгуулан ажиллаж байна. Одоогийн байдлаар Ложистикийн төвд суурилуулагдах холбоо, дохиоллын байгууламжийн ажиллах зарчмын болон гадна дотор холболтын бүдүүвчүүд бүхий зураг төслийн багц ажил дуусч, хээрийн байгууламжийн кабелийн сувагчлалын ажлууд хийгдэж, тоног төхөөрөмжүүдийн захиалга дуусч, барилгын талбайд эхний ээлжийн тоног төхөөрөмжүүд ирж байна. Хүнд даацын краны 800 метр урттай төмөр замын барилга угсралтын ажил бүрэн дууссан.

Төвийн дулаан хангамжийн барилга, жолооч ажилчдын байр, гаалийн барилга, захиргааны барилга, засварын төв, цэвэр усны нөөц сан, бохир ус цэвэршүүлэх байгууламжийн барилгуудын тоног төхөөрөмжийн суурилуулалт, дотор засал чимэглэл, дохиоллын систем болон интернет, холбооны сувагчлал, цахилгаан сүлжээ, дулаан, цэвэр бохир усны шугам хоолойн дотор холболтын ажлууд хийгдэж байна. Гаалийн агуулахын талбай, хүнд машины зогсоол, захиргааны гадна зогсоол, талбайн ажлууд хийгдэж, чингэлгийн талбайн хавтан болон хэв хашмалын өрөлтийн ажил амжилттай явагдаж байна. Талбайн гэрэлтүүлгийн ажил бүрэн дууссан бөгөөд өнөөдрийн байдлаар төслийн нийт барилга угсралтын ажлын гүйцэтгэлийн явц 85%-тай байна.  Мэдээлэл шинэчилэгдсэн: 2018-06-12

 

Хаяг:

Улаанбаатар хот-15141, Чингэлтэй дүүрэг,

Жуулчны гудамж 4/4 Макс цамхаг 1001 тоот

Утас: (976-11) 70112254 Факс: (976-11) 70112253

И мэйл: rld_project@yahoo.com


Мэдээ нийтлэгдсэн: 2017-09-01 16:28:06

2018 он © Зам, тээврийн хөгжлийн яам
Вэб сайтыг Ай Ти Солушинс хөгжүүлэв.