Монгол Улсад авто замын салбар үүсч хөгжсөний 86 жилийн ой, Нийслэлийн авто замын газар үүсэн байгуулагдсаны 10 жилийн ойд зориулсан спортын арга хэмжээ өчигдөр эхэлсэн. Сагсан бөмбөг, гар бөмбөг, теннис, шатрын төрлийн спортоор өрсөлдөхөөр авто зам барилгын 55 компанийн 700 гаруй тамирчин “Буянт Ухаа” спорт цогцолборт цугларчээ. Тэмцээн хоёр өдөр үргэлжлэх бөгөөд найм дахь жилдээ зохион байгуулагдаж буй энэхүү тэмцээнийг Монголын авто замчдын холбоо жил бүр зохион байгуулдаг юм. МАЗХ-ны ерөнхийлөгч Т.Бямбаа тэмцээнийг нээж хэлсэн үгэндээ, улс орны бүтээн байгуулалтад гар бие оролцож байгаа авто замчиддаа баярын мэнд хүргээд, тэмцээнд нь амжилт хүслээ. Спортын дөрвөн төрөлт тэмцээний нээлтэд ЗТЯ, Нийслэлийн авто замын газар, Зам, тээврийн хөгжлийн төв болон холбогдох албаны хүмүүс оролцлоо. Тэмцээний дүн өнөөдөр гарах юм.